१६असोज,पोखरा।ढोरपाटन नगरपालिकाका मेयर एवं इमेज बचत तथा ऋण सहकारी संस्थाको संस्थापक अध्यक्ष देवकुमार नेपाली सहकारीका रकम अपचलन अभियोगमा पक्राउ परेकालाई जिल्ला अदालत बागलुङले पुर्पक्षका लागि थुनामा पठाउने आदेश दिएको छ ।
भारतको नयाँ दिल्लीमा ११ असोजमा पक्राउ परेका नेपालीलाई भारतीय प्रहरी सहयोगमा नेपालमा ल्याएर सोमबार अदालतमा उपस्थित गराइएको थियो । सोमबारको बयानपछि मंगलबार थुनछेक बहससँगै अदालतले यस्तो आदेश आएको हो । सहकारीको शाखा कार्यालय कास्कीमा समेत भएको र यहाँ समेत उजुरी परेकोले नेपालीलाई कास्की जिल्ला अदालतमा पनि उपस्थित गराइनेछ ।
संस्थापक अध्यक्ष नेपालीले बागलुङ जिल्लामा मात्र १ अर्ब ३८ करोड रुपैयाँ अपचलन गरेको भन्दै सोही बराबरको बिगो माग गरी अदालतमा अभियोग दायर भएको छ । कास्कीमा शाखा रहेको सहकारीमा उनले ६० करोड रुपैयाँ अपचलन गरेको अभियोग छ । यसरी कास्की र बागलुङमा गरी बचतकर्ताको करिब २ अर्ब रुपैयाँ ठगी गरेको अभियोगमा मुख्य प्रतिवादी बनाइएका नेपाली १६ महिनादेखि फरार थिए । उनलाई पक्राउ गर्न गत वर्ष माघमा रेड कर्नर नोटिसमेत जारी भएको थियो ।
एमालेबाट २०७४ र २०७९ को स्थानीय तह निर्वाचनमा ढोरपाटनको मेयर जितेका नेपाली अध्यक्ष रहेको इमेज सहकारीको मुख्य कार्यालय बागलुङ बजारमा छ । शाखा कार्यालयहरू पोखराको सिर्जनाचोक तथा बालगुङको हटिया र बुर्तिबाङ बजारमा छन् ।
त्यसै, सोही सहकारी ठगी प्रकरणमा पक्राउ परेका ओमबहादुर नेपाली भने डेढ लाख रुपैयाँ धरौटीमा रिहा भएका छन् । ओमबहादुर नेपाली देवकुमारका भाइ हुन् ।
सहकारी ठगी अभियोगमा सहकारीका पदाधिकारी चित्रबहादुर भण्डारी, शक्ति किसान, डोरबहादुर परियार, लालमती बुढा, लक्ष्मी सेन र अनिता बुढामगर भने यसअघि नै पुर्पक्षका लागि बागलुङ कारागारको थुनामा र्ताहेका छन् ।
