१४ चैत, वीरगन्ज |वीरगन्ज बजारको मुख्य सडक २५/२५ मि.विस्तारको विरोधमा उत्रिएका घरधनी र व्यवसायीले विरोधस्वरूप बिहीबार बिहानदेखि मध्याह्न १२ बजेसम्म पसल बन्द गरेर उनीहरुले विरोध जनाएका हुन् ।
सडक विस्तार रोक्नका लागि ‘वीरगन्ज युवा तथा व्यापारी सडक पीडित संघर्ष समिति’ गठन गरेर संघर्ष थालिएको हो ।
सो समिति साबिकको वीरगन्ज बचाउ संघर्ष समिति मातहतकै समिति रहेको समितिका संयोजक जवाहरप्रसाद गुप्ताले बताए । उनले समितिको चरणबद्ध संघर्ष जारी रहने बताए । सर्वोच्च अदालतको फैसलाको पूर्ण पाठ आउनुअघि नै सडक विस्तारको काम सुरु गर्नु गलत भएको उनको भनाइ छ ।
वीरगन्ज–९ का वडाध्यक्ष समेत रहेका गुप्ताले मुख्य सडक २५/२५ मिटर विस्तार गर्दा वीरगन्जको इतिहास र सहरको अस्तित्व मेटिने खतरा रहेको बताए ।
गुप्ताले घरधनी र व्यवसायीलाई उचित मुआब्जा नदिई गरिने सडक विस्तारको काम स्वीकार्य नहुने पनि बताए । आफूहरुको मागलाई सम्बोधन नगरिए चरणबद्ध आन्दोलन गर्न बाध्य हुने उनले चेतावनी दिए ।
वीरगन्जको मुख्य सडक विस्तारविरुद्ध घरधनीले दिएको रिट सर्वोच्च अदालतले फागुन २८ गते खारेज गरेको थियो । त्यसपछि सडक विभागले महानगर कार्यालयसँग समन्वय गरेर सडक फराकिलो गर्ने तयारी सुरु गरेको हो । विभागले महानगरसँग समन्वय गरी नापी कार्यालयमार्फत सडक सीमांकन प्रक्रिया अघि बढाएको छ ।
संघर्ष समितिले बिहीबार नै प्रमुख जिल्ला अधिकारी गणेश अर्यालमार्फत प्रधानमन्त्रीलाई वीरगन्ज बचाउ ज्ञापनपत्र पठाउँदै मुख्य सडक विस्तारको काम रोक्न माग गरेको छ । प्रहरी उपरीक्षक गौतम मिश्र तथा सशस्त्र प्रहरी उपरीक्षक राधेश्याम धिमाल समेतको उपस्थितिमा समितिका संयोजक जवाहरप्रसाद गुप्ताले उक्त ज्ञापनपत्र प्रजिअ अर्याललाई बुझाएका थिए । ज्ञापनपत्रमा समितिको माग अविलम्ब पूरा नगरिए संघर्ष जारी राख्ने चेतावनी समेत दिइएको छ ।
