२७ साउन,वीरगञ्ज ।एनइएको निर्वाचन साउन ३० गते वीरगञ्जमा हुने भएको छ|नेपाल इन्जिनियर्स एसोसिएसन (एनइए) वीरगञ्ज केन्द्रको आगामी साउन ३० गते हुने निर्वाचनमा सभापति पदका लागि स्वतन्त्र समूह बनाएर उम्मेदवारी दिएका ई. धिरज कुमार साह नेतृत्वको एनइएएन प्यानलले आफ्नो महत्त्वाकाङ्क्षी कार्य योजना सार्वजनिक गरेको छ ।
कार्य योजनाले इन्जिनियर र आर्किटेक्टहरूको पेसागत विकास, हकहित संरक्षण, र सामाजिक उत्तरदायित्वलाई केन्द्रमा राखेर वीरगञ्ज केन्द्रलाई प्राविधिकहरूको सशक्त मञ्चका रूपमा स्थापित गर्ने लक्ष्य लिएको छ ।ई. धिरज कुमार साह नेतृत्वको प्यानलले निर्वाचनमा विजयी भए लगत्तै वीरगञ्ज केन्द्रमा सम्पर्क कार्यालय स्थापना गर्ने प्रतिबद्धता जनाएको छ । कार्यालयले सदस्यहरूको पहुँच र सहजता सुनिश्चित गर्नेछ ।
निर्वाचन पश्चात् साह नेतृत्वको प्यानलले अनुभवी प्राविधिकहरूको सल्लाह र सुझावलाई कार्य योजनामा समावेश गर्नका निमित्त पर्सा, बारा, र रौतहट जिल्लाका अग्रज इन्जिनियर र आर्किटेक्टहरूलाई समेटेर “अग्रज इन्जिनियर समिति” गठन गर्ने योजना पनि बनाएको छ ।सोही गरी प्यानलले अर्को महत्त्वपूर्ण योजनाको रूपमा इन्जिनियर्स भवन निर्माणलाई लिएको छ । भवन निर्माणका लागि केन्द्र, प्रदेश, र स्थानीय तहसँग बजेट व्यवस्थापनको पहल गरिने साहको भनाइ छ । आवश्यक परेमा चन्दा सङ्कलनमार्फत पनि प्रक्रियालाई अघि बढाइने साहले बताए । “इन्जिनियर्स भवनले हाम्रो पेसागत पहिचानलाई बलियो बनाउनुका साथै प्राविधिकहरूको साझा मञ्च प्रदान गर्नेछ,” उनले भने ।
एनइएएन प्यानलले इन्जिनियरिङ पेसालाई राजनीतिक हस्तक्षेपबाट मुक्त राख्दै विशुद्ध पेसागत अभ्यासको वातावरण निर्माण गर्ने अठोट लिएको छ । नयाँ इन्जिनियर र आर्किटेक्टहरूका लागि सरकारी तथा गैरसरकारी संस्थाहरूमा सशुल्क वा निःशुल्क इन्टर्नसिप को व्यवस्था गर्नुका साथै सपोर्ट डेस्क स्थापना गरिनेछ । “हामी नयाँ पुस्ताका इन्जिनियरहरूलाई व्यावहारिक ज्ञान र अवसर प्रदान गर्न चाहन्छौँ,” साहले भने, “इन्टर्नसिप र सपोर्ट डेस्कमार्फत उनीहरूको करिअरको सुरुवातलाई सहज बनाउनेछौँ ।”
रौतहट र सर्लाही जिल्लालाई समेटेर मतदान केन्द्र स्थापना गर्ने पहल गदै यस क्षेत्रका प्राविधिकहरूको सहभागिता बढाउने पनि साह नेतृत्वको प्यानलले आफ्नो योजना बनाएको छ । साथै, इन्जिनियर र आर्किटेक्टहरूको स्टार्टअप लाई प्रोत्साहन गर्न इन्जिनियरिङ सहकारी संस्था स्थापना गर्ने योजना पनि प्यानलको प्राथमिकतामा छ । “हाम्रो पेसालाई उद्यमशीलतासँग जोडेर नयाँ सम्भावनाहरू खोल्नेछौँ,” साहले जोड दिए ।
त्यस्तै स्थानीय तहमा कार्यरत इन्जिनियरहरूले लामो समयदेखि भोग्दै आएका प्रशासनिक र राजनीतिक दबाबका समस्यालाई सम्बोधन गर्न प्यानलले विशेष जोड दिएको छ । माथिल्लो पदमा प्राविधिक व्यक्तिको नियुक्तिका लागि लबिङ गर्नुका साथै नेपाल सरकारले तोकेको इन्जिनियरिङ सेवाको न्यूनतम पारिश्रमिक तत्काल लागू गर्न पहल गर्ने पनि प्यानलको योजना छ । “हाम्रा सहकर्मीहरूले सम्मानजनक पारिश्रमिक र काम गर्ने वातावरण पाउनुपर्छ । यो हाम्रो पहिलो प्राथमिकता हो,” साहले भने ।
यसका साथै, अनलाइन र अफलाइन प्राविधिक तालिम, सेमिनार, र एकीकृत सूचना प्रणाली मार्फत देशभरका रिक्त पदहरूको जानकारी उपलब्ध गराएर प्राविधिकहरूको क्षमता अभिवृद्धि गर्ने कार्यलाई पनि प्यानलले आफ्नो प्राथमिकता बनाएको छ । “हामी हाम्रा सदस्यहरूलाई विश्वस्तरीय प्राविधिक ज्ञान र अवसरसँग जोड्न चाहन्छौँ,” साहले बताए ।
सामाजिक दायित्वप्रति प्रतिबद्ध रहँदै एनइएएन प्यानलले पानीको अभाव, विद्युत् आपूर्तिमा अवरोध, सडक, ढल निकास, र सार्वजनिक पूर्वाधार का समस्यामा प्राविधिक सहयोग प्रदान गर्ने वाचा गरेको छ । “हामी इन्जिनियरहरूलाई सामाजिक उत्तरदायित्वप्रति जागरूक बनाउँदै समाजको विकासमा प्रत्यक्ष योगदान पुर्याउन चाहन्छौँ,” साहले भने, “हाम्रो प्राविधिक ज्ञानले स्थानीय समस्याहरू समाधान गर्न महत्त्वपूर्ण भूमिका खेल्नेछ ।”
केन्द्रीय र प्रदेश समितिका योजनालाई इमानदारीपूर्वक सहयोग गरी इन्जिनियरिङ पेसालाई विकास उन्मुख र जनता प्रति समर्पित बनाउने प्यानलको दृढ सङ्कल्प छ । “हामी केवल संस्था चलाउनका लागि मात्र उम्मेदवारी दिएका छैनौँ, हामी इन्जिनियरिङ पेसालाई नयाँ उचाइमा पुर्याउन चाहन्छौँ,” साहले जोड दिए ।
त्यस्तै एनइए समुहका ई. धिरज कुमार साह प्यानलको उप-सभापतिको उम्मेदवार ई.अभिषेक कु.गुप्ताले देशमा कुनैपनि प्राविधिक वा ननप्राविधिक पेसाकर्मीहरु राजनेतिक दबाव मुलक नभई स्वतन्त्र मुलक कार्यको राम्रो र उतम हुन्छ भनि हामि स्वतन्त्र एनईए समूह बनाएका आफ्नो बिचार राख्नु भयो|त्यसैले एनईए प्यानललाई आफ्नो मत दिएर विजय गराउनु भनि सबैमा गुप्ताले अपिल गरेको छ|
ई. धिरज कुमार साह नेतृत्वको एनइए एन प्यानलले वीरगञ्ज केन्द्रलाई प्राविधिकहरूको हितमा समर्पित, पारदर्शी, र प्रभावकारी संस्थाका रूपमा स्थापित गर्ने दृढ सङ्कल्प लिएको छ । निर्वाचन नजिकिँदै गर्दा, प्यानलको कार्य योजनाले इन्जिनियर र आर्किटेक्टहरूको पेसागत विकास, सामाजिक उत्तरदायित्व, र प्राविधिक नेतृत्वलाई नयाँ दिशा दिने अपेक्षा गरिएको छ ।
