१० पुस, काठमाडौं । आगामी फागुन २१ गते हुने प्रतिनिधिसभा निर्वाचन नजिकिँदै जाँदा वैकल्पिक राजनीतिक शक्तिहरूबीचको दौडधुप तीव्र बनेको छ । यही क्रममा ऊर्जा, भौतिक पूर्वाधार तथा सहरी विकासमन्त्री कुलमान घिसिङ र काठमाडौं महानगरपालिकाका मेयर बालेन्द्र शाह (बालेन) बीच बिहीबार बिहान महत्वपूर्ण भेटवार्ता भएको छ ।
ललितपुरमा भएको उक्त ‘वान–टु–वान’ छलफलमा आगामी निर्वाचनमा सम्भावित सहकार्य, मोर्चाबन्दी र सत्ताको बाँडफाँट (पावर सेयरिङ) का विषयमा प्याकेजमै सहमति जुटाउने प्रयास गरिएको बताइएको छ । दुवै नेताले आफूलाई भावी प्रधानमन्त्रीको दाबेदारका रूपमा अघि सारिरहेका बेला भएको यो भेटलाई राजनीतिक वृत्तले अर्थपूर्ण रूपमा हेरेको छ ।
छलफलका क्रममा बालेनले आफूलाई प्रधानमन्त्रीको प्रमुख उम्मेदवारका रूपमा स्थापित गर्नुपर्ने अडान राखेको स्रोतको दाबी छ । उता मन्त्री घिसिङले पनि सोही पदका लागि आफूलाई प्रोजेक्ट गरिरहेका कारण दुई प्रभावशाली व्यक्तित्वबीचको सहकार्यमा नेतृत्वको प्रश्न मुख्य चुनौती बनेको देखिएको छ ।
निर्वाचनका लागि नयाँ शक्ति र सरोकारवाला पक्षहरूसँग निरन्तर संवाद गरिरहेका यी दुई नेताबीच सहमतिको प्रयास भए पनि तत्काल ठोस निष्कर्ष भने निस्कन सकेको छैन । कुलमान निकट स्रोतका अनुसार छलफल सकारात्मक दिशामा अघि बढेको र विभिन्न विकल्पमा गृहकार्य भइरहेको छ । गत मंसिर १४ गतेपछि दोस्रो पटक भएको यो भेटघाटले वैकल्पिक राजनीतिमा नयाँ ध्रुवीकरणको संकेत दिएको विश्लेषण गरिएको छ ।
कुलमानसँगको छलफलपछि मेयर बालेनले राष्ट्रिय स्वतन्त्र पार्टी (रास्वपा) का सभापति रवि लामिछानेसँग पनि भेटवार्ता गरेका छन् । एकै दिन दुई ठूला राजनीतिक शक्तिसँग संवादमा जुटेका बालेन आफ्नै नेतृत्वमा नयाँ राजनीतिक दल गठन गर्ने वा रास्वपा र कुलमान पक्षधर शक्तिसँग मिलेर वृहत् मोर्चा बनाउने अन्तिम तयारीमा रहेको संकेत मिलेको छ ।
निर्वाचन आउन अब दुई महिना मात्र बाँकी रहँदा यी उदयमान शक्तिहरूबीचको पावर सेयरिङ र सहकार्यले परम्परागत दलहरूलाई कस्तो चुनौती दिन्छ भन्ने विषय आगामी दिनमा हुने थप वार्ताले स्पष्ट पार्नेछ ।
