काठमाडौं । अमेरिकी रियालिटी टीभी स्टार तथा सौन्दर्य व्यवसायी काइली जेनरले करिब ५ करोड अमेरिकी डलर (नेपाली रुपैयाँ ७ अर्ब ५९ करोडभन्दा बढी) मूल्यको फ्यान्टेसी ब्रा लगाएर भिक्टोरियाज सेक्रेट फेसन शोमा डेब्यु गरेकी छन्। उनको सहभागिताले प्रशंसा र आलोचना दुवै निम्त्याएको छ।
२९ वर्षीया काइली आइतबार आयोजित लन्जरी ब्रान्ड भिक्टोरियाज सेक्रेटको वार्षिक फेसन शोमा हिराजडित ब्रा लगाएर प्रस्तुत भएकी थिइन्। डिजाइनसम्बन्धी विवरणअनुसार उक्त ब्रा १८ क्यारेट सुन र ४ हजार ४१० क्यारेट हिरा प्रयोग गरेर तयार पारिएको हो। महँगो तथा आकर्षक डिजाइनका कारण उनको प्रस्तुति कार्यक्रमको मुख्य आकर्षण बनेको थियो।
भिक्टोरियाज सेक्रेटको फ्यान्टेसी ब्रा लामो समयदेखि फेसन शोको विशेष आकर्षणका रूपमा रहँदै आएको छ। यस्तो ब्रा लगाउन पाउनुलाई मोडलका लागि प्रतिष्ठित अवसर र करियरको महत्त्वपूर्ण उपलब्धिका रूपमा लिइन्छ।काइलीलाई यो अवसर दिइएपछि उनका प्रशंसकहरूले खुसी व्यक्त गरेका छन्। तर, लामो समयदेखि मोडलिङ क्षेत्रमा सक्रिय अनुभवी सुपरमोडलहरूलाई अवसर नदिइएको भन्दै केहीले ब्रान्डको निर्णयमाथि प्रश्न उठाएका छन्।
सामाजिक सञ्जाल तथा मार्केटिङ विशेषज्ञ जोएल मार्लिनारसनका अनुसार काइलीको सहभागिता ब्रान्डको योजनाबद्ध मार्केटिङ रणनीतिको हिस्सा हो। उनका अनुसार अहिलेका ब्रान्डहरूले परम्परागत मोडलिङको अनुभवभन्दा पनि दर्शकको ध्यान आकर्षित गर्ने क्षमता र लोकप्रियतालाई प्राथमिकता दिन थालेका छन्।उनले बीबीसीसँग भनेका छन्, “काइलीले सेलिब्रेटी संसारको नयाँ युगको प्रतिनिधित्व गर्छिन्, जहाँ ब्रान्डहरूले परम्परागत रूपमा मोडलको परिभाषामा को फिट हुन्छ भन्नेभन्दा पनि कसले सबैभन्दा बढी ध्यान आकर्षित गर्न सक्छ भन्ने कुरालाई प्राथमिकता दिइरहेका छन्।”
काइलीको सहभागिताले फेसन उद्योगमा सेलिब्रेटी प्रभाव र सामाजिक सञ्जालको बढ्दो शक्तिबारे बहसलाई थप चर्चामा ल्याएको छ। लोकप्रिय व्यक्तित्वलाई फेसन शोमा सहभागी गराउँदा ब्रान्डले ठूलो संख्यामा दर्शकको ध्यान खिच्न सक्ने भएकाले यस्ता निर्णयलाई मार्केटिङ रणनीतिसँग जोडेर हेर्न थालिएको छ।यस घटनाले परम्परागत मोडलिङ अनुभव र सामाजिक सञ्जालबाट प्राप्त लोकप्रियताबीच फेसन उद्योगमा कुन पक्ष बढी प्रभावकारी छ भन्ने बहसलाई समेत उजागर गरेको छ।
