२० चैत,वीरगञ्ज । बीरगन्जको होटल भिस्वाको क्यासिनोबाट ४ जना नेपालीलाई पर्सा प्रहरीले दुइ साता अगाडि पक्राउ गरेको थियो ।
नेपालीहरुलाई कर्मचारीहरुको मिलोमतोमा क्यासिनोमा प्रवेश दिलाएको भन्दै ३ जना कर्मचारीसहित ४ जनालाई पक्राउ गरेको थियो l
६ चैतमा प्रहरीले पोखराका प्रताप लामा, सर्लाहीका उमेश कार्की, बीरगन्जका पप्पु सिंह र सुरज कलवारलाई नियन्त्रणमा लिएको थियो । प्रहरीका अनुसार जसमा एक जना नेपाली जुवाडेसहित ३ जना कर्मचारी पक्राउ परेका थिए । अहिले चारैजना धरौटीमा रिहा छन् ।यो घटनाको ठीक १२ दिन पछाडि अर्को क्यासिनोमा नेपाली प्रवेश गरेर विवाद भएको भिडिओ सामाजिक सञ्जालमा भाइरल बन्यो । त्यो भिडिओ हो– दियालो किंग्स रोयल क्यासिनोको ।
भाइरल भिडिओमा नेपाली जुवाडेहरु क्यासिनोका वेटरसंग खाने कुरा माग्दा नदिएपछि दुबै जनाबिच विवाद भएको देखिन्छ, जहाँ ती नेपाली जुवाडेले वेटरमाथि हातपात नै गरेका प्रष्टरुपमा देखिरहेको छ ।
दियालोमा किंग्स रोयल क्यासिनोका यही भिडिओ अहिले सामाजिक सञ्जालमा छ्यापछ्याप्ती छन् । हो, यो भिडिओमा विवाद जेसुकै विषयमा भएपनि यसले एउटा अर्को के खुलासा गरिरहेको छ भने किंग्स रोयल क्यासिनोमा पनि नेपालीहरुलाई सजिलै प्रवेश दिएर जुवा खेलाउने काम भइरहेको छ्, जुन नियमतः गलत हो । यी अधिकांश क्यासिनोमा २ वटा नियमविपरीत काम भइरहेको तथ्यले नै प्रमाणित गरिरहेको छ ।
नेपालीलाई प्रवेश दिलाउनु र खेलाउनै नपाइने कार्ड गेम खेलाउने काम क्यासिनो नियमावलीविपरीत हो । क्यासिनोमा खासगरी नेपालीबाहेकालाई प्रवेश पाउँने नियम छ ।
तर वीरगञ्जका क्यासिनोहरुले भने क्यासिनो नियमावली (२०७०) लाई बेवास्ता गर्दै नियमविपरीत क्यासिनोमा नेपालीहरुलाई प्रवेश मात्रै गराइरहेका छैनन्, खेलाउनै नपाइने कार्ड गेम पनि सजिलै खेलाइरहेका छन् ।
“क्यासिनो” भन्नाले पर्यटकको मनोरञ्जनको लागि परम्परागत रुपमा वा आधुनिक मेशिन वा उपकरणको माध्यमबाट क्यासिनोस्थलमा बाजी (वेट) राखी रकम जित वा हार हुने गरी खेलिने खेल सम्झनु पर्छ ।
तर वीरगञ्जका यी सबै क्यासिनोमा भने कार्ड गेम र डेक्रेट कार्ड गेम हुने गरेको छ । जुन नियमावलीले खेलाउँन मिल्दैन ।
कारण– वीरगञ्जका क्यासिनो मिनी क्यासिनो हो, यस्ता खाले क्यासिनोमा कार्ड गेम ‘ब्यान्ड’ हो । तरपनि बीरगन्जका क्यासिनोहरुमा निर्वाधरुपमा कार्ड गेम भइरहेका छन् । कार्ड गेममा तासको फ्लास र म्यारिज खेल हुने गरेको स्रोत बताउँछ ।
यही नियमावलीमा नेपालीहरुलाई प्रवेश दिने क्यासिनोलाई नियमावली अनुसार त्यसको इजाजतपत्र नै रद्द गर्ने व्यवस्था छ ।
तर क्यासिनो नियमावली २०७६ ले तोकेको खेलहरु भन्दा बाहिरका खेलहरु भइरहेको घटना बाहिर आएपनि प्रशासनिक निकाय भने चुपचाप छ ।
तर कानुन पालना गराउँने निकाय नै नियम उल्लंघन हुने गम्भीर विषयमा मौन बसेपछि यत्र,तत्र सर्वत्र प्रश्न उठिरहेको छ । यो प्रश्न नियमक निकायसंग मात्रै नभइ पर्साका अन्य सुरक्षा निकायका प्रमुखसंग पनि तेर्सिएको छ ।
के भन्छन् सिडिओ ?
पर्साका प्रमुख जिल्ला अधिकारी दिनेश सागर भुसालले क्यासिनोहरुमा नेपाली प्रवेश गराउनु भनेको एकदम गम्भीर त्रुटिको विषय रहेको प्रतिक्रिया दिए ।
बिरगंजमा कति छन क्यासिनो त?
वीरगञ्जमा चारवटा क्यासिनो सञ्चलानमा छन् । वीरगञ्जको क्लार्क रिसोर्ट, भिस्वा होटल, दियालो लर्डस र सुरज होटलमा क्यासिनो सञ्चालनमा छन् ।
क्लार्कमा गोल्डेन फिंगर गेमिङजोन, भिस्वामा सेन्ट्रल मिडिया गेमिङ क्लब, दियालोमा किंग्स रोयल क्यासिनोको नाममा इजाजतपत्र लिएर यी क्यासिनोहरु सञ्चालित छन् । यसैगरी सुरजमा भने फोरचुन सिटीको नाममा क्यासिनो सञ्चालित छ ।
