वीरगञ्ज । रौतहटमा सशस्त्र प्रहरी बलले भन्सार छलेर अवैध रूपमा भित्र्याइएको सुर्तीजन्य पदार्थ बरामद गरेको छ। बरामद गरिएको सुर्तीको बजार मूल्य ३ लाख ६२ हजार ७५० रुपैयाँ बराबरको रहेको सशस्त्र प्रहरीले जानकारी दिएको छ।
ईशनाथ नगरपालिका–४ मठिया स्थित रामसिंह चनौको भट्टी पसल नजिक र चुमन मियाको धानखेतमा लुकाएर राखिएको अवस्थामा ३० बोरामा भण्डारण गरिएको ७४५ किलो सुर्तीजन्य पदार्थ बरामद गरिएको हो। सशस्त्र प्रहरी बल नेपाल नम्बर ११ गण मुख्यालय रौतहटका गणपति सशस्त्र प्रहरी उपरीक्षक सन्तोष कुमार बस्नेतको कमाण्डमा र बोर्डर आउट पोस्ट औरैयाका सशस्त्र प्रहरी निरीक्षक खेमराज जोशी नेतृत्वको टोलीले आइतबार राति सीमाक्षेत्रमा चेकजाँचको क्रममा उक्त सामग्री फेला पारेको हो।
बरामद भएको अवैध सुर्तीजन्य वस्तुहरू आवश्यक कानूनी कारबाहीका लागि गौर भन्सार कार्यालयमा बुझाइएको सशस्त्र प्रहरीले जनाएको छ। सशस्त्र प्रहरीका अनुसार सीमावर्ती क्षेत्रमा चोरीपैठारी रोक्न गस्ती र निगरानी अझ कडा पारिएको छ।
