वीरगञ्ज । भारतका प्रधान न्यायधीश बी.आर. गवईमाथि सर्वोच्च अदालतभित्रै जुत्ता प्रहार भएको छ ।
सोमबार बिहान करिब ११ : ३५ बजेको समय कोठा नम्बर १ मा रहेको इजलासमा ७१ वर्षका अधिवक्ता राकेश किशोरले सुनुवाइका क्रममा आफ्नो जुत्ता फुकालेर गवईतर्फ फ्याँकेका भारतीय सञ्चार माध्यमले जनाए अनुसार ।
जुत्ता प्रहार गरेका अधिवक्ता किशोरले हिन्दु सनातन धर्मको अपमान सहन सकिन्न भनेका छन् । गवईले न्यायाधीश के. विनोद चन्द्रनसँगको इजलासमा १६ सेप्टेम्बरमा खजुराहो मन्दिर परिसरको जवारी मन्दिरमा रहेको ७ फिट अग्लो भगवान् विष्णुको भग्न मूर्ति पुनर्निर्माणको मागसहित दायर याचिका खारेज गरेका थिए ।
सोही आदेशलाई लिएर अधिवक्ता किशोर असन्तुष्ट रहेको खुलेको छ । जुत्ता फाले लगतै प्रहरीले अधिवक्ता किशोरलाई नियन्त्रणमा लिएर अनुसन्धान सुरु गरेको छ । उनी सर्वोच्च अदालत बार एसोसिएसनका सदस्य पनि रहेको भारतीय सञ्चारमाध्यमले जनाएका छन् ।
