२९ पुष, काठमाडौं — राष्ट्रपति रामचन्द्र पौडेलकी छोरी संज्ञा पोखरेल पौडेलले नेपाली कांग्रेसको समानुपातिक उम्मेदवारको बन्दसूचीबाट आफ्नो नाम फिर्ता लिएकी छन्। निर्वाचन आयोगले तोकेको समयसीमाभित्रै उहाँले उम्मेदवारीबाट हट्ने निर्णय गर्नुभएको हो।
कांग्रेसले बुझाएको समानुपातिक सूचीमा पोखरेलको नाम ६२औँ नम्बरमा समावेश भएपछि राजनीतिक वृत्त र सामाजिक सञ्जालमा व्यापक चर्चा र आलोचना सुरु भएको थियो। राष्ट्रपतिजस्तो निष्पक्ष र सम्मानित पदमा रहेका व्यक्तिको परिवारका सदस्य सक्रिय राजनीति तथा लाभको पदमा जानु उपयुक्त नहुने भन्दै प्रश्न उठाइएका थिए।
यही आलोचना र विवादका बीच पोखरेलले स्वेच्छाले नाम फिर्ता लिने निर्णय गर्नुभएको बुझिएको छ। उहाँले नाम फिर्ता लिएको पुष्टि गर्दै अब पार्टीले आवश्यक प्रक्रिया अगाडि बढाउने जानकारी दिनुभएको छ।
निर्वाचन आयोगले विभिन्न दलका समानुपातिक सूचीबाट नाम फिर्ता लिएका ८५ जनाको स्थानमा नयाँ नाम पठाउन पत्राचार गरिरहेको सन्दर्भमा पोखरेलको निर्णय आएको हो। उहाँको नाम फिर्ता भएसँगै नेपाली कांग्रेसले उक्त रिक्त स्थानमा अर्को उम्मेदवार सिफारिस गर्ने बाटो खुलेको छ। यसअघि पनि प्रभावशाली नेताका परिवारका सदस्यहरू सूचीमा पर्दा आलोचना हुँदै आएको पृष्ठभूमिमा पोखरेलको कदमलाई कतिपयले नैतिक दबाबको परिणामका रूपमा विश्लेषण गरेका छन्।
