२९बैसाख,वीरगञ्ज । नयाँ लुगा किन्दिन्छु भन्ने प्रलोभन दिएर एक नाबालिगकालाई भारतको रक्सौलमा लगेर यौन धन्दामा लगाउने प्रहरीले खातुनलाई पक्राउ गरेको छ । पक्राउ पर्नेमा वीरगञ्ज महानगरपालिका – १६ नगवाकी २४ वर्षीय आलिया खातुन रहेकी छन् ।
आलियाले नगवाकै विपन्न परिवारकी अन्दाजी १४ वर्षीय एक नाबालिगकालाई नयाँ लुगा किन्दिने र पैसा पनि दिने प्रलोभन दिएर वैशाख २१ गते सीमावर्ती रक्सौल बजारमा लगेकी थिइन् । त्यहाँ आलियाले नाबालिगकालाई विभिन्न लजमा ७ दिनसम्म राखेर यौन धन्दामा लगाएकी थिइन् ।
नाबालिगकाका अभिभावकले छोरी घरबाट सम्पर्कविहीन भएपछि खोजतलासका लागि प्रहरी कार्यालयमा निवेदन दिएका थिए । त्यसपछि खोजतलासमा खटिएको प्रहरीले आलिया र नाबालिगका दुवै जना आलियाको घरमा रहेको सूचना शुक्रवार मध्यरातमा पाएको थियो ।
शनिवार बिहान २ बजेतिर इलाका प्रहरी कार्यालय नगवाबाट खटिएको प्रहरी टोलीले नगवास्थित आलियाको घरमा पुगेर छापा मारेर नाबालिगकाको उद्धार गर्नुका साथै आलियालाई नियन्त्रणमा लिएको पर्साका प्रहरी उपरीक्षक (एसपी) गौतम मिश्रले जानकारी दिए ।
प्रहरीसँगको बयानका क्रममा पीडित नाबालिगकाले आफूलाई आलियाले झुक्क्याएर रक्सौल बजारमा लगेको र त्यहाँका विभिन्न लजमा लगेर पुरुष ग्राहकसँग पैसा लिएर आफूलाई यौन धन्दामा लगाएको बताएको एसपी मिश्रले जानकारी दिए ।
मिश्रका अनुसार, अनुसन्धानका क्रममा पक्राउ परेकी आलियाले यसभन्दा पहिला पनि बालिका र किशोरीलाई विभिन्न प्रलोभन दिएर यौन धन्दामा लगाउने गरेको खुलेको छ ।
आलियाविरुद्ध मानव बेचबिखन तथा ओसार पसार नियन्त्रण ऐन २०६४ अन्तर्गतको कसुरमा पर्सा जिल्ला अदालतबाट ५ दिनको म्याद थप अनुमति लिई अनुसन्धान भइरहेको प्रहरी उपरीक्षक मिश्रले जानकारी दिए ।
मिश्रले आफूले पर्सा प्रहरी प्रमुखको कार्यभार सम्हाले यताको पछिल्लो ३ महिनाको अवधिमा मात्रै जिल्ला प्रहरी कार्यालय पर्सामा मानव बेचबिखन तथा ओसार पसार नियन्त्रण ऐन २०६४ अन्तर्गतको कसुरमा ८ वटा मुद्दा दर्ता भएको जानकारी दिए । उक्त मुद्दामा ८ जना पक्राउ परेको र तीमध्ये ५ जनालाई अनुसन्धान सकाएर पुर्पक्षका लागि कारागारमा पठाइएको र बाँकी ३ जना अनुसन्धानकै क्रममा प्रहरी थुनामा रहेको प्रहरी उपरीक्षक मिश्रले बताए ।
