३०बैसाख,वीरगञ्ज । अख्तियार दुरुपयोग अनुसन्धान आयोगले बाराका हुलाक कार्यालय प्रमुख कुर्मीसहित ६ जनाविरुद्ध पाँच करोडभन्दा बढी भ्रष्टाचार गरेको मुद्दा दायरगरेको छ ।
बचतकर्ताहरूको ५ करोड ३५ लाख ६४ हजारभन्दा बढी रकम हिनामिना गरेको गम्भीर आरोपमा कार्यालयका वर्तमान प्रमुख बलीराम प्रसाद कुर्मीसहित पूर्वप्रमुखहरू जयलाल प्रसाद साह कानू, अदालतप्रसाद कुर्मी, बुन्नीप्रसाद यादव, सुरेन्द्रप्रसाद यादव र सुजितकुमार साहमाथि भ्रष्टाचारको कसुरमा मुद्दा चलाएको हो ।
कुर्मीले २०६० सालदेखि नै कार्यालयको बचत बैंकको जिम्मेवारी सम्हाल्दै आएका थिए । उनले बचतकर्ताको रकमको कुनै अभिलेख नराखी आफूखुसी दुरुपयोग गरेको उजुरी अख्तियारमा परेको थियो । उक्त उजुरीमाथि गहिरो अनुसन्धान गर्दा कुर्मीले तत्कालीन कार्यालय प्रमुखहरूसँग मिलेर बचत रकम आपसमा बाँडफाँट गरी अपचलन गरेको तथ्य फेला परेको अख्तियारका प्रवक्ता राजेन्द्रकुमार पौडेलले जनाएको छ ।
घोटालामा साँवा र ब्याजसहित कुल ५ करोड ३५ लाख ६४ हजार २७९ रुपैयाँ हिनामिना भएको अख्तियारको ठहर छ । अख्तियारले यही रकमलाई बिगो मानेर अभियुक्तहरूलाई कैद सजाय र जरिवानाको मागसहित मुद्दा दायर गरेको छ ।
घटनाले सरकारी कार्यालयमा हुने आर्थिक अनियमितताप्रति गम्भीर प्रश्न उठाएको छ । स्थानीय बचतकर्ताहरूको विश्वासमाथि ठूलो आघात पुगेको प्रकरणले पारदर्शिता र जबाफदेहिताको आवश्यकता झनै उजागर गरेको छ ।
