१७माघ, वीरगञ्ज ।पर्साका प्रहरी प्रमुख प्रहरी उपरीक्षक (एसपी) गौतम मिश्रले पर्साको सुरक्षा व्यवस्थालाई मजबुत बनाउने प्रतिबद्धता व्यक्त गरेका छन् । यो भन्दा पहिला पनि श्रीपुरमा बसेर आफ्नो कर्तव्य निर्वाह गरिसकेको स्मरण गर्दै उनले पुनः पर्साको प्रमुख भएर फर्कँदा यहाँका चुनौतीहरूसँग आफू परिचित रहेको बताए ।
शुक्रबार आयोजित पत्रकार भेटघाटमा एसपी मिश्रले पर्सा जिल्ला आर्थिक तथा औद्योगिक गतिविधिको केन्द्र भएकाले यसको सुरक्षा व्यवस्थालाई उच्च प्राथमिकता दिनुपर्ने बताए । “देशमा भित्रिने अधिकांश सामग्री यहीँबाट भित्रिन्छ, आर्थिक कारोबार धेरै हुन्छ । यसले पर्सालाई संवेदनशील जिल्ला बनाएको छ,” उनले भने ।
एसपी मिश्रले पर्सामा विगतमा देखिएका चन्दा आतंक, भूमिगत समूहको त्रास र आपराधिक गतिविधि निरुत्साहित भइसकेको उल्लेख गर्दै अब यसलाई पूर्ण रूपमा नियन्त्रण गर्न पहल गरिने बताए । उनले राजस्व चुहावट नियन्त्रण, भन्सार चोरी निकासी रोकथाम तथा साइबर अपराध नियन्त्रणलाई प्राथमिकता दिने स्पष्ट पारे ।
मिश्रले भने, “अपराध अनलाइनबाट हुन थालेको छ । साइबर ठगीका घटनाहरू बढेका छन्, बैंकिङ कसूर, चेक बाउन्स जस्ता मुद्दा वृद्धि भएका छन् । यी सबैलाई नियमन गर्न हामी सतर्क रहनेछौं ।”
एसपी मिश्रले ग्रामिण भेगमा बढ्दो लैंगिक हिंसा, लागुऔषध कारोबार, गाँजा तस्करी रोकथामलाई विशेष प्राथमिकता दिइने बताए । विद्यालय र स्थानीय तहसँग सहकार्य गरेर समुदाय–प्रहरी साझेदारी कार्यक्रमलाई निरन्तरता दिने उनको योजना छ ।
“यहाँका नागरिकलाई सुसूचित गर्ने र सचेत गराउने अभियानमा प्रहरीको सक्रिय भूमिका रहनेछ । अपराध नियन्त्रण र अनुसन्धानलाई प्रभावकारी बनाइनेछ,” उनले थपे ।
एसपी मिश्रले “कानुनले भनेका कुरालाई पूर्ण रूपमा कार्यान्वयन गर्नेछौं । शान्ति सुरक्षा कायम गर्न हामी पछि हट्ने छैनौं,” राम्रो काम गर्ने प्रहरीलाई पुरस्कृत गर्ने र अनुशासन उल्लंघन गर्नेहरूलाई कारबाहीको दायरामा ल्याइने भने ।
उनले जिल्ला प्रहरी कार्यालय पर्सालाई जनउत्तरदायी बनाउँदै अपराधमुक्त समाज निर्माणका लागि सबैसँग सहकार्य गर्ने प्रतिवद्धता व्यक्त गरे ।
